ભારતની હસ્તકલાનો ખજાનો હવે એક જ જગ્યાએ, NMACCનું સ્વદેશ પેવેલિયન બન્યું આકર્ષણનું કેન્દ્ર

ડિજિટલ ડિઝાઇન અને મોટા પાયે ઉત્પાદનના યુગમાં પણ હાથથી બનાવેલી વસ્તુઓનું મહત્વ આજે પણ અકબંધ છે. કારણ કે દરેક હસ્તકલા પાછળ માત્ર સુંદરતા નહીં પરંતુ વર્ષોનું જ્ઞાન, પરંપરા અને કારીગરોની મહેનત છુપાયેલી હોય છે. મુંબઈ સ્થિત નીતા મુકેશ અંબાણી કલ્ચરલ સેન્ટર (NMACC) ખાતેનું સ્વદેશ પેવેલિયન ભારતની આ જ સમૃદ્ધ હસ્તકલા પરંપરાને નવી રીતે રજૂ કરી રહ્યું છે.

સાત પેવેલિયનમાં ભારતીય કળાનો વારસો

રિલાયન્સ ફાઉન્ડેશનની પહેલ સ્વદેશ હેઠળ NMACCના સભાગૃહ પરિસરમાં સાત પેવેલિયન બનાવવામાં આવ્યા છે, જ્યાં દેશના વિવિધ વિસ્તારોની અનોખી હસ્તકલાઓનું પ્રદર્શન કરવામાં આવે છે. હાલના પ્રદર્શનમાં દિલ્હી, ઉત્તરપ્રદેશ અને પશ્ચિમ બંગાળનું જરદોશી કામ, તેલંગણા અને રાજસ્થાનના દંક પોલ્કી દાગીના, રાજસ્થાનના પિછવાઈ ચિત્રો, ઉત્તરપ્રદેશનું બનારસી વણાટકામ, કાશ્મીરના કાલ બાફી ગાલીચા અને સોઝની ભરતકામ તેમજ ઓડિશા અને તેલંગણાની ચાંદીની તારકશી કળા સામેલ છે.

કારીગરોની મહેનતને નજીકથી જોવાની તક

સ્વદેશ પેવેલિયનની ખાસિયત એ છે કે અહીં મુલાકાતીઓ માત્ર તૈયાર વસ્તુઓ જ નથી જોતા, પરંતુ તેની પાછળની પ્રક્રિયાને પણ સમજી શકે છે. કારીગરો અહીં પોતાની કળા જીવંત રીતે રજૂ કરે છે. મુલાકાતીઓ તેમની સાથે વાતચીત કરીને પેઢીઓથી મળેલા જ્ઞાન અને કૌશલ્ય વિશે જાણી શકે છે. ઓડિશાના ચાંદીના કારીગરો ચાંદીને અત્યંત પાતળા તાર સ્વરૂપે ખેંચીને ફિલિગ્રી એટલે કે તારકશી કામ તૈયાર કરે છે. જ્યારે બનારસી વણકરો રેશમના અનેક તાર વડે પરંપરાગત લૂમ પર વણાટ કરે છે.

આ પણ વાંચો: Kutch Rann Utsav: 10.41 લાખથી વધુ પ્રવાસીઓ ઉમટ્યા, સ્થાનિક સ્ટોલની કરોડોમાં આવક

હસ્તકલા પાછળની કહાણીને ઉજાગર કરતું પ્લેટફોર્મ

સ્વદેશ માત્ર હસ્તકલા વેચાણ કે પ્રદર્શનનું સ્થળ નથી, પરંતુ તે કારીગરો, તેમની પરંપરા અને તેમની કળા પાછળની કહાણીઓને લોકો સુધી પહોંચાડતું સાંસ્કૃતિક કેન્દ્ર છે. ભારતીય કળા અને આધુનિક અભિવ્યક્તિને એક સાથે લાવતું NMACCનું સ્વદેશ પેવેલિયન દેશના કારીગરોના વારસાને નવી પેઢી સુધી પહોંચાડવાનો પ્રયાસ કરી રહ્યું છે.

અમારી WhatsApp ચેનલમાં જોડાવા નીચે આપેલી લિંક પર ક્લિક કરો

https://whatsapp.com/channel/0029VbDPNhHISTkJEDTirJ16